Pétur Henry Petersen hlýtur viðurkenningu fyrir lofsvert framlag til kennslu

Thu, 24/11/2022 - 11:02 -- skb

Fjórir starfsmenn Háskóla Íslands tóku við viðurkenningum fyrir lofsvert framlag í starfi við skólann á sviði kennslu, rannsókna, jafnréttismála og annarra starfa. Viðurkenningarnar voru afhentar á upplýsingafundi rektors fyrir starfsfólk 23. nóvember. 

Viðurkenningar fyrir lofsverðan árangur í starfi hafa verið veittar við Háskóla Íslands í rúma tvo áratugi. Í upphafi var þremur starfsmönnum veitt viðurkenning á sviði kennslu, rannsókna og almennra starfa en fyrir þremur árum var tekin upp sú nýbreytni að bætt var við fjórðu viðurkenningunni fyrir lofsvert framlag til jafnréttismála. Er þetta í samræmi við þá áherslu sem lögð er á jafnréttismál í stefnu Háskóla Íslands. Frá upphafi hafa rúmlega 70 manns hlotið viðurkenninguna.

Staðið er þannig að viðurkenningunum að öllu starfsfólki og nemendum gefst kostur á að senda inn tilnefningar í gegnum rafræna gátt, auk þess sem formenn kennslumálanefndar, vísindanefndar og jafnréttisnefndar senda inn tilnefningar.

Pétur Henry Petersen, prófessor við Læknadeild á Heilbrigðisvísindasviði Háskóla Íslands, hlýtur viðurkenningu fyrir lofsvert framlag til kennslu. Hann lauk doktorsprófi í sameindalíffræði og taugavísindum frá Yale-háskóla í Connecticut í Bandaríkjunum og var ráðinn lektor við Háskóla Íslands 2009, dósent 2012 og prófessor 2020. 

„Pétur Henrý hefur verið mjög virkur í margvíslegri kennsluþróun á undanförnum árum. Hann hefur beitt sér í umræðu um kennslumál á vettvangi Læknadeildar og Heilbrigðisvísindasviðs, hefur unnið að innleiðingu kennsluforrita og setið í kennsluráði og kennslumálanefnd sviðsins. Hann hefur einnig lagt sig sérstaklega eftir fræðilegri hlið kennslunnar og hefur lagt stund á nám í kennslufræði fyrir háskólakennara sem hefur eflt hann til kennsluþróunar.  Pétur hefur haft frumkvæði að breytingum á námi læknanema og annarra heilbrigðisvísindanema og m.a. þróað nýjar leiðir til að virkja nemendur í námi sínu. Hann hefur tekið þátt í þróun lausnaleitarnáms (e. problem based learning) í Læknadeild í því skyni að tengja það betur við grunngreinar og almenna þætti í þjálfun læknanema. Slík kennsla er mjög nemendamiðuð og eflir færni nemenda í að samþætta nám sitt,“ segir m.a. í umsögn valnefndar um Pétur Henry.

Þá er bent á að Pétur Henry hafi lagt sig fram um að tengja kennsluna við framtíðarstarf nemenda enda hafi þeir jafnan mikinn áhuga á klínískum tengingum þótt oft reynist örðugt að koma til móts við það í grunnnámi. „Loks hefur Pétur Henry gert tilraunir með fjölbreyttara námsmat en almennt tíðkast með því að byggja á verkefnum fremur en lokaprófi og með því að nota einkunnina staðið/fallið í stað tölulegrar lokaeinkunnar sem beinir sjónum frekar að inntaki námsins og þýðingu þess. Slíkar og aðrar breytingar hvetja í sjálfu sér til umræðu um kennslumál og hvernig best megi tryggja gæði menntunar. Í stuttu máli hefur Pétur Henrý hvatt til umræðu um kennslu, tekið þátt í umræðu um kennslu, haft frumkvæði að bættri eða breyttri kennslu og þannig unnið á fjölbreyttan hátt að auknum gæðum náms.“

Á myndinni hér fyrir neðan má sjá handahafa viðurkenninganna ásamt rektor Háskóla Íslands, Jóni Atla Benediktssyni. Þau eru Kristinn Ingvarsson, ljósmyndari við markaðs- og samskiptasvið Háskóla Íslands sem hlaut viðurkenningu fyrir lofsvert framlag til stjórnsýslu og stoðþjónustu við Háskóla Íslands, Anna Helga Jónsdóttir, dósent við Raunvísindadeild á Verkfræði- og náttúruvísindasviði Háskóla Íslands sem hlaut viðurkenningu fyrir lofsvert framlag til jafnréttismála við Háskóla Íslands, Hanna Ragnarsdóttir, prófessor við Deild kennslu- og menntunarfræði á Menntavísindasviði Háskóla Íslands sem hlaut viðurkenninguna fyrir lofsvert framlag til rannsókna og Pétur Henry Petersen, prófessor við Læknadeild á Heilbrigðisvísindasviði Háskóla Íslands, sem hlaut viðurkenningu fyrir lofsvert framlag til kennslu.

Fjögur verðlaunuð fyrir lofsvert framlag í starfi

Fjögur verðlaunuð fyrir lofsvert framlag í starfi - á vefsíðu Háskóla Íslands
 
Hægt er að nálgast fréttina í fullri lengd á heimasíðu Háskóla Íslands

 

 

Þú ert að nota: brimir.rhi.hi.is