Björn Rúnar Lúðvíksson er nýskipaður forseti Norrænu ónæmisfræðisamtakanna

Thu, 22/10/2020 - 16:11 -- skb

Björn Rúnar Lúðvíksson, yfirlæknir ónæmisfræðideildar Landspítala og prófessor í ónæmisfræði við læknadeild Háskóla Íslands, var útnefndur forseti Norrænu ónæmisfræðisamtakanna (SSI - Scandinavian Society for Immunology) til næstu 6 ára á 50 ára afmælisfundi samtakanna þann 14.október síðastliðinn.

SSI eru samnorræn samtök ónæmisfræðinga með hátt í 1100 félagsmenn og hafa það að markmiði að styðja við norrænt samstarf ónæmisfræðinga á sviði vísinda og fræðslu ásamt að vera leiðandi afl innan Evrópsku ónæmisfræðisamtakanna. Meðal helstu verkefna þeirra er skipulagning vísindaþinga, málstofa, sumarskóla og þátttaka í útgáfu Scandinavian Journal of Immunology.

Björn Rúnar lauk sérfræðinámi í almennum lyflækningum við University of Wisconsin í Madison og síðan framhaldsnámi í klínískri ónæmisfræði við National Institutes of Health í Bandaríkjunum og lauk doktorsprófi við læknadeild Háskóla Íslands 1999. Björn Rúnar var skipaður yfirlæknir ónæmisfræðideildar Landspítala og prófessor í ónæmisfræði við læknadeild árið 2007. Rannsóknir hans hafa á undanförnum árum beinst helst að samspili meðfæddra ónæmisgalla við tilurð sjálfsónæmissjúkdóma með áherslu á ósértækt ónæmissvar. Einnig hefur hann unnið að þróun rafrænna lausna við greiningu og meðferð sjúkdóma. Hann hefur hlotið margvíslegar viðurkenningar fyrir störf sín, m.a. valinn heiðursvísindamaður Landspítalans árið 2017 en verðlaunin eru veitt árlega einstaklingi sem þykir hafa náð framúrskarandi árangri í vísindarannsóknum á sínum starfsferli.

Lífvísindasetur Háskóla Íslands sendir Birni Rúnari hamingjuóskir með þetta nýja embætti, en Björn er einn af meðlimum setursins.

Þú ert að nota: brimir.rhi.hi.is