Úthlutun styrkja úr Vísindasjóði Krabbameinsfélagsins

Wed, 24/06/2020 - 22:45 -- skb

Vísindasjóður Krabbameinsfélagsins veitti á dögunum 69 milljónum króna til 11 rannsókna árið 2020. Úthlutun ársins var kynnt á aðalfundi félagsins þann 6. júní.

Úthlutað var úr sjóðnum í fjórða sinn og nam heildarupphæð styrkja rúmlega 69 milljónum króna. Alls bárust 29 umsóknir um styrk úr sjóðnum. Eftir umfjöllun Vísindaráðs Krabbameinsfélagsins valdi stjórn Vísindasjóðs 11 rannsóknir sem hlutu styrki að upphæð frá 1,8 milljónir upp í 10 milljónir króna.

Markmið sjóðsins er að efla íslenskar rannsóknir á krabbameinum með því að styrkja árlega með fjárframlögum rannsóknir á orsökum krabbameina, forvörnum, meðferð og lífsgæðum sjúklinga.

Vísindasjóðurinn var stofnaður í desember 2015 með framlögum frá Krabbameinsfélaginu og aðildarfélögum þess. Auk þess rann minningarsjóður Ingibjargar Guðjónsdóttur Johnson og sjóður Kristínar Björnsdóttur inn í sjóðinn. Formaður sjóðsstjórnar er Sigríður Gunnarsdóttir, framkvæmdastjóri hjúkrunar á Landspítala og prófessor.

Á meðal 11 styrktra verkefna árið 2020 tengjast alls 6 verkefni starfi Lífvísindaseturs Háskóla Íslands.

Þau eru:

Styrkhafi Upphæð Verkefni
Bylgja Hilmarsdóttir 3.100.000 Þróun örvefjalíkana úr briskrabbameini og notkun þeirra sem módel fyrir notkun PARP hindra í meðferð
Erna Magnúsdóttir 10.000.000 BLIMP1 miðluð stjórnun á frumuhring í Waldenströmsæxlum
Gunnhildur Ásta Traustadóttir 4.500.000 Hlutverk peroxidasin í eðlilegum og illkynja brjóstkirtli
Hans Tómas Björnsson 9.122.525 Kortlagning kæliferilsins í krabbameinsfrumum til að varpa ljósi á ný meðferðarmörk, áhrif á lifun og meðferðarsvörun
Inga Reynisdóttir 1.840.000 Aukin tjáning Vacuole Membrane Protein 1 (VMP1) tengist verri horfum sjúklinga með HER2 brjóstakrabbamein
Margrét Helga Ögmundsdóttir 8.500.000 Sjálfsát í krabbameinum: Greining á spendýrasértæku hlutverki ATG7

Upplýsingar um öll styrkt verkefni má finna á heimasíðu Krabbameinsfélags Íslands.

Þú ert að nota: brimir.rhi.hi.is