Ólafur Eysteinn Sigurjónsson prófessor hlýtur rannsóknaverðlaun Háskólans í Reykjavík

Fri, 17/01/2020 - 13:49 -- skb

Ólafur Eysteinn Sigurjónsson, forstöðumaður hjá Blóðbankanum og prófessor við verkfræðideild Háskólans í Reykjavík, hlaut rannsóknarverðlaun HR fyrir árið 2019. Hann hefur meðal annars stundað rannsóknir á sviði endurmyndunarlæknisfræði (e. regenerative medicine), vefjaverkfræði og blóðbankafræði. Í meðfylgjandi myndskeiði er rætt við Ólaf Eystein um rannsóknir hans og þýðingu þeirra.

Við veitingu rannsóknaverðlauna HR er horft til fjölda þátta eins og birtinga á ritrýndum vettvangi, öflun styrkja, framlags til alþjóðlegs vísindasamfélags, þjálfun nemenda í rannsóknum og tengingu rannsókna við atvinnulíf og samfélag. Ólafur Eysteinn hefur á starfsferli sínum verið afkastamikill rannsakandi og öflugur í nýsköpunarstarfi, hann hefur tekið virkan þátt í alþjóðlegu rannsóknastarfi og átt þátt í, eða borið ábyrgð á, öflun 45 stærri og smærri rannsóknarstyrkja.

Ólafur Eysteinn hefur verið forstöðumaður rannsókna, nýsköpunar og stofnfrumuvinnslu blóðbanka Landspítala frá árinu 2006. Hann er einnig stofnandi og annar af eigendum nýsköpunarfyrirtækisins Platome líftækni og gegnir þar stöðu rannsóknarstjóra. Platome þróar svonefndar ætislausnir fyrir frumuræktun með því að nota blóðflögur sem hafa verið geymdar of lengi til að nýtast til blóðgjafar og yrði því annars fargað.

Ólafur er fæddur árið 1974 og lauk stúdentsprófi frá Menntaskólanum í Reykjavík árið 1994, BS-gráðu í sameindalíffræði frá Háskóla Íslands árið 1998 og MS-gráðu í lífvísindum frá læknadeild Háskóla Íslands árið 2001. Árið 2006 varði Ólafur doktorsritgerð við Ónæmisfræðistofnun Ríkisháskólasjúkrahússins í Osló og við Lífeðlisfræðistofnun læknadeildar Háskólans í Osló. Fyrir ritgerðina, sem fjallar um hæfileika stofnfrumna til mismunandi sérhæfingar, hlaut hann gullorðu Haraldar Noregskonungs. Ólafur hefur verið forseti Skandinavísku lífstoðefnissamtakanna frá árinu 2016.

Hér má sjá myndbandsupptölu sem fylgdi fréttinni.

Fréttin var tekin af fésbókarsíðu Landspítala.

Þú ert að nota: brimir.rhi.hi.is