Dr. Sarah McGarrity hlýtur 75 milljóna króna styrk frá Novo Nordisk

Tue, 02/04/2019 - 16:07 -- skb

Dr. Sarah McGarrity, nýdoktor við Kerfislíffræðisetur, Læknadeild Háskóla Íslands hefur hlotið fjögurra ára Novo Nordisk post doc styrk upp á tæplega 75 milljónir króna. Um er að ræða samstarfsverkefni milli Brigham & Women's Hospital, Harvard Medical School í Boston, Rigshospitalet í Kaupmannahöfn og Læknadeild Háskóla Íslands.  

Verkefnið kallast: "The effect of the endothelial glycoclayx on superoxide dismutase, glutathione peroxidase and nitric oxide synthase activities during stimulation - Postdoc Fellowship for research abroad - Endocrinology & Metabolism 2019," sem útfærist á íslensku: Áhrif sykrunga á virkniensíma samfara virkjun æðaþels. 

Verkefnið er grunnrannsóknarverkefni þar sem leitast er við að kanna hlutverk yfirborðs sykrunga og ensíma í starfsemi og virkjun æðaþels. Æðaþel er einfrumulag á innanverðum æðum. Sykrungar á yfirborði æðaþelsfrumna eru samsettir úr löngum greinóttum keðjum af einsykrum t.d. glúkósa, mannósa og glúkósamíni sem mynda einskonar varnarvegg milli blóðs og vefja. Virkjun æðaþels er einn þáttur í eðlilegu bólgusvari.  Brenglað bólgusvar tengist margvíslegum hjarta- og æðasjúkdómum svo sem hjartaáfalli, háþrýstingi og heilablóðfalli en þáttur yfirborðssykrunga á æðaþeli er illa skilgreindur.  Þess má geta að verkefnið verður unnið í samstarfi við Dr. Joseph Loscalzo, sem mun halda fyrirlestur á vegum framhaldsnáms í lífvísindum (GPMLS) og Lífvísindaseturs Háskóla Íslands þann 13. maí næstkomandi.

Sarah, sem hefur áður unnið að efnaskiptarannsóknum á æðaþeli á tilraunastofu Óttars Rolfssonar, verður staðsett í Boston fyrstu þrjú árin en síðasta árið verður hún hér á landi. Styrkurinn kemur að fullu til Háskóla Íslands og er ætlaður að styrkja alþjóðleg rannsóknartengsl og verkefni.  Árlega eru veittir fimm Novo Nordisk post doc styrkir og er þetta í fyrsta skipti sem slíkur styrkur hefur fengist hingað til lands.

 

Þú ert að nota: brimir.rhi.hi.is